فى استديو

 

 

فلنفرض انك فى استوديو ! ..
وفلحظه خيالك قام سارح ..
ومرايتك كات كاميرة فيديو ! ..
بتجيبلك تفاصيل امبارح ..
تتك زرار بتشوف صورة ..
كات فيها ملامحك امورة ..
كان فيها عيون لسه بتضحك  ..
م الاخر كانلك فيها حياه ..
تتك زرار ارض الواقع ..
الصورة كئيبه يا حول الله  ..
بتجمّع حزنك فى ملامح ..
والباقى معاك من ماضى كفيف !..
بتحسّس على ذكرى امبارح ..
كالاعمى بقيت مش شايف طيف ! ..
بتحس ان خلاص دى نهايتك ..
بتحاول تهرب م الحاله ..
تتك زراير فى مرايتك ..
مبقيتش اساسا شغاله..
تتفاجئ بعد الروح ما تضيق ..
فى زرار متحرك فى اتجاهين !! ..
متردد خايف تختار شئ ..
مش عارف هيروح بيك على فين ! ..
قدامك حل من الاتنين ..
يا تزقّه شمال يا تزقّه يمين ..
اختار الاسهل فى الطريقين ..
الحل بسيط انتا المحتار ! ..
ومضيع عمرك فى التفكير ..
هتموت مش قادر يوم تختار ! ..
وقرارك مش محتاج للغير ..
هتزقه يمين وتكمل سير  ..
واقلّه هتخرج من حالتك ..
وهتخلص من اوجاع بتزيد !! ..
مش معنى الفقد انك ضايع ..
مش يمكن كات فرصة تعويض ؟!! ..
خد كل الحلو ف ايامك ..
سيب كل الذكرى المأثورة  ..
اختار لزراير احلامك ! ..
فى زراير الماضى المكسورة !! ..
واتعوّد بص لقدامك ..
من تانى هتضحك فى الصورة ..
‫#‏كاميرة_فيديو‬

تابع القراءة Résuméabuiyad

ولانى بخاف

 

 

ولانى بخاف م الناس جدا
..
انا بهرب قبل ما يحصل شئ !
..
وبفارق من الاول عمداً
..
لو مهماً كان الشخص برئ !

تابع القراءة Résuméabuiyad

حوْدَه يمين

حوْدَه يمين

الدنيا شوارع ناس ماشية ..

ناس غاوية تسوق كل الماشين ..

ناس رايحه معاك على فين رايح ..

ناس فارقت اول حَوْدَة يمين !! ..

ناس رايحه تقابل ناس تانيين ..

سبقوهم جابو اخر الشارع ..

ناس عايشه اساسا بتصارع ..

ناس سايبه الذكرى على الشباك ! ..

بتتوه فى نهار حلم مسارع ..

وف عز الليل رجلك واخداك ..

على نفس الشارع ف الضلمة ..

كان ايه ودّاك ؟!

رشيت برفان على كام هِدمة ..

ورجعت لباب بيت الذكرى ..

والناس بتقول يلزم خدمة ؟!..

عنوانها اتغير على فكره ..

مبقتش هناك !! ..

وفلحظه الاصوات تتخفّت ..

هربان م الجرح بتتلفّت ..

بتبص يمينك وشمالك 

علشان خوّاف ..

راجع مكسور وسط الضلمه ..

وجرحك متشاف !!

وبكسرة قلبك فى سريرك ..

بتدارى جروحك جوا لحاف ..

وبييجى نهار على احلامك ..

تتعمّد تانى تروح بيتها !

اما انتا غريب ! ايللى جرالك ؟

البيت مسكون مبقاش بيتها !

انتا اللى مصمم يوميا ..

تتمشّى محازى لسكتها !

ولا ابدا مره هتتلاقو ..

العاشق كان دايما يخسر ..

لما بيتمسّك بغباؤه ..

والناس لما فيوم بتفارق ..

مش لازم يعنى تقول على فين ..

عايشين وبغصبن عن روحنا ..

كلنا بنفارق بنى ادمين ..

وحبيبتك كات م النوع اللى 

بيفارق اول حَوْدَه يمين ..

#حوْدَه_يمين

تابع القراءة Résuméabuiyad

أخر ركعه

اليوم بيضيع وسط التسهيم ..
والتفكير فى حاجات مش جايه !..
القلب اساسا لسه سليم ..
لكن حساباتك مش هيا ! ..
احسبها بعقلك لو مره ..
تلاقيها اساسا منهيه ! ..
بتورط روحك فى مشاكل ..
مع كل الخلق بتتشاكل ..
ومطفى النور جوه فروحك ..
ومضلم جدا من جوه !! ..
وبترسم ايدك ف جروحك ..
بتدمر نفسك بالقوه !! ..
مين قال ان الناس مبتنساش !
الناس مش بتحاول تنسى ..
بتحب ف واحد لسه مجاش ..
او جه واتعمد يوم ينسى !!
الناس بتحب تعيش جدا ..
وسط درامة دور المجروح
من غير اسباب واضحة اساسا ..
تلقيهم بيطلعو فى الروح
الناس الاوفر ام دموع ..
جربت احاول اقلدهم !! ..
ودخلت المود من كام اسبوع ..
مش عارف اخرج من مودهم ..
وبدأت اتكلم بكلامهم ..
وبعيداً عن كل السامعين ..
بقى نفسي اسافر او اهرب ..
بقى نفسي اتوه لو بس يومين ..
الشات مفتوح كله رسايل ..
مش عايز اكلم بنى ادمين !! ‏‎
الكون بيضلم اوى كدا ليه ..
وسواده اتسرب جوايا !
طب اكلم حد يخرجنى ؟ ..
انا شايف واحد يشبهنى !
كان قاعد جنبى وويايا
رحمن يا رحيم ايه اللى بيجرا ..
انا يعنى بعيط اوى كدا ليه ‎‏  ..
انا شكلى بأفور على فكره !! ..
اساعدنى ازاى او اعمل ايه ..
الوضع هيستنى لبكره ..
انا قولت اروح اهدأ واصلى ..
مع اخر ركعه بدأت اضحك ..
هو انا كان ايه اللى حاصلى ..
انا ربى كبير بيجمّعنى ..
انا ميت فجأة لقاله حياة ..
وعرفت الغلطه خلاص يعنى ! ..
انا كنت بعيد عن ذكر الله ..
‫#‏اخر_ركعة‬

تابع القراءة Résuméabuiyad